TAGBILARAN CITY, Bohol, Sept. 10 (PIA)–Mikabat sa 3 milyon ang gidaghanon sa mga Pinoy na walay trabaho sa buwan sa Hulyo 2013.
Sa gi-prinisintar nga July 2013 Labor Force Survey sa National Statistics Office (NSO), miingon si Socio-economic Planning Secretary Arsenio Balisacan nga nisaka sa 7.3 porsiyento ang unemployment rate karong tuig gikan sa 7.0 porsiyento sa susamang buwan niadtong 2012.
Matud pa ni Balisacan, kadaghanan sa mga walay trabaho mga kabataan nga kulang ang kahanas ug kasinatian alang sa mga trabaho nga gitanyag sa nagkalain-laing kumpanya.
Tungod niini, giingong hingusgan pa sa gobyerno ang mga programang pang-edukasyon ug pagnegosyo sa nasud.
Samtang nisaka sa 38.2 milyon ang gidaghanon sa mga Pinoy nga adunay trabaho gikan sa 37.6 milyon niadtong Hulyo 2012.
Mikabat sa 7.6 porsiyento ang gross domestic product sa first half sa 2013 nga niresulta sa 620,000 nga mga bag-ong trabaho, apan dili kini igo sa baga nga populasyon sa Pilipinas. (PIA-Bohol/ecb)
