TAGBILARAN CITY, Bohol, Sept. 06 (PIA)–Nisaka og 10 puntos ang grado sa Pilipinas sa global competitiveness ranking matud pa sa resulta nga gipagawas sa 2012 World Economic Forum (WEF) Global Competitiveness Report.
Gikan sa kanhi 75th place sa niaging tuig, naa sa ika-65th na ang nasud gikan sa kinatibuk-ang 144 economies sa tibuok kalibotan base sa ilang survey nga gihimo niadtong buwan sa Abril hangtud Hunyo ning tuig.
Sa maong report, gitumbok nga ang Pilipinas ang usa sa mga nasud nga nitala sa “most improvement.”
Nanguna ang Pilipinas sa Vietnam nga naa sa ika-75th ug Cambodia nga naa sa ika-85th nga pwesto.
Ikaduhang tuig na kini sa Pilipinas nga nitala og 10 puntos nga pagsaka diin nabutang usab ang nasud sa ika-75th sa niaging tuig gikan sa 85th nga pwesto niadtong tuig 2010.
Apil sa mga kabag-ohan niini ang pagsalig sa mga Filipino sa ilang mga lider, pagkunhod sa korapsyon ug paglambo sa ekonomiya. (PIA-Bohol/ECB/I-ed)
DFA: Pahimosli ang evacuation efforts sa Syria
TAGBILARAN CITY, Bohol, Sept. 06 (PIA)–Nanawagan na usab ang Department of Foreign Affairs (DFA) sa tanang mga Pilipino sa Syria nga pahimoslan na ang gihingosgan nga repatriation efforts sa gobyerno.
Matud pa ni Foreign Affairs Usec. Rafael Seguis, naglisud pa gihapon sila sa pagpangita sa uban pang mga Pinoy ilabi na ang mga illegal domestic helpers.
Dugang pa ni Seguis nga nihatag na og commitment ang Syrian government alang sa luwas nga pagbakwit sa mga Pinoy.
Gani, dakung tabang alang sa Pilipinas ang desisyon sa Syria nga tugotan ang may 250 ka mga Filipino workers nga makagawas sa nasud bisan walay mandatory exit requirements, sama sa exit visa.
Una nang giseguro sa DFA nga himuon sa gobyerno ang tanan aron makapaule og luwas ang tanang Pinoy nga napiit sa kagubot sa maong rehiyon. (PIA-Bohol/ECB/I-gg)
PRESS RELEASE
Philippine Information Agency
Tagbilaran City Information Center
411-2292/ 501-8554/ 0920 954 5482 email piabohol171@yahoo.com
Palasyo, positibong igo ang suplay sa bugas sa 2013
TAGBILARAN CITY, Bohol, Sept. 06 (PIA)–Masaligon ang Malakanyang nga igo ang suplay sa bugas sa Pilipinas sa 2013.
Kini human sa pahayag sa Asian Development Bank (ADB) nga imposibleng maabot sa Pilipinas ang tinguha niining mahimong self-sufficient sa suplay sa bugas sa pagtapos sa 2013 tungod sa ubos nga kalidad sa imprastraktura sa pag-uma ug taas nga kantidad sa produksyon.
Matud pa ni Presidential Spokesperson Edwin Lacierda, nanghatag na og ayuda ang Department of Agriculture (DA) sa mga mag-uuma nga naapektuhan sa mga milabay nga bagyo ug uban pang kalamidad.
Apil na niini ang pangapud-apod og mga binhi ug libreng insurance sa mga mag-uuma partikular na ang mga naperwisyo sa Habagat. (PIA-Bohol/ECB/I-gg)
Oil Review Committee, nihimakak nga may gidapigan sa isyu sa overpricing
TAGBILARAN CITY, Bohol, Sept. 06 (PIA)–Hingpit nga gihimakak sa Independent Oil Price Review Committee nga wala silay gidapigan sa isyu sa overpricing sa mga produktong petrolyo sa nasud.
Matud pa ni Committee Head Dr. Benjamin Diokno, dili tinuod ang gipahayag ni IBON Foundation Executive Director Sonny Africa nga gipaboran nila ang presyuhan sa oil companies sa bag-o lang gipagawas nilang resulta nga walay nahimong overpricing ang mga oil companies.
Gitumbok ni Diokno nga wala sila’y posisyon sa gobyerno ug apil ang mga miyembro sa komite, wala usab affiliation sa gobyerno.
Dugang pa niini, komprehensibo ang gihimo nilang pagtuon sa mga book of account nga gitugyan sa mga kumpanya sa lana.
Gipasabot usab ni Diokno ang ilang mandato sa imbestigasyon apil na ang gihimong proseso.
Giingong una nilang gikumparar ang paglihok sa presyo sa petrolyo sa nasud ug sa international market ug migawas nga stable man kini.
Matud pa nga gikumparar usab nila ang presyuhan sa nasud sa Thailand ug nakita nilang pareho lang usab ang pagbag-o sa presyo sa gasolina ug krudo.
Pasabot pa ni Diokno, kun ikumparar sa ubang matang sa negosyo, mas gamay ang kita sa mga oil firms.
Gihagit ni Diokno ang mga kritiko nga pamatud-an nila kun gi-unsa nahimong sakto ug komprehensibo ang ilang buwag nga pagtuon diin giingong may nigawas nga overpricing sa presyo sa petrolyo sa nasud. (PIA-Bohol/ECB/I-gg)