MANILA, Dec. 17 (PIA)–Pangunahan sa Land Transportation Franchising and Regulatory Board (LTFRB) ug sa Department of Labor and Employment (DOLE) ang mga ahensiyang mosiguro sa kaluwasan sa mga pasahero sa pampublikong mga sakyanan human sa nahitabong disgrasya sa kadalanan sa Skyway sa kaulohan kagahapon sa buntag.
Matud pa ni Presidential Communications Operations Office Sec. Herminio Coloma, dili tugotan sa administrasyong Aquino nga makakuha og pagtugot sa gobyerno ang mga iresponsableng operators ug mga badlongong driver nga nagdala og mga dili luwas nga sakyanan.
“Ang kaligtasan ng mga pasahero ang laging una sa administrasyong Aquino. Ang layunin nito ay huwag mabigyan ng pahintulot ng gobyerno ang mga iresponsableng operators at mga tsuper na walang habas sa pagmamaneho na naglalagay sa panganib ng buhay ng mga pasahero nila,” matud pa ni Coloma sa usa ka press briefing sa Malakanyang ganina.
Gitumbok ni Coloma nga hingpit nga gibantayan sa DOLE karon kun misunod ang mga tag-iya og bus sa mga sumbanan sa occupational health and safety standards.
Nagpatuman na usab ang DOLE og two-tier wage system diin ang mga driver ug konduktor adunay katungod sa minimum wage ug performance-based pay.
Kini nga mando sa DOLE, aron mapugos ang mga tag-iya og bus nga mokuha og Labor Standards and Compliance Certificate nga kinahanglan sa pagkuha sa bag-o nilang mga prangkisya.
Aron dili na mausab pa ang trahedyang nahitabo sa kaulohan niadtong Lunes, itakda sa gobyerno ang mga sumbanan sa pagpatuman sa engineering ug edukasyon.
Matud pa ni Coloma nga sa pagpatuman niini, siguradohong sundon sa katawhan ang itakdang limitasyon sa kadalanan, samtang ang engineering sa desenyo sa kaluwasan sa mga kadalanan pinaagi sa ibutang nga closed-circuit television cameras.
Tuyo usab sa edukasyon nga mas magmatngon ang katawhan nga kinahanglan ang kaluwasan sa mga kadalanan. (PIA7-Bohol/ECB)