BOHOL, Jan. 04 (PIA)–Gigahin ang kantidad nga P6.5 bilyon sa 2016 General Appropriations Act (GAA) alang sa rehabilitasyon ug upgrading sa mga kadalanan sa probinsiya sa 73 ka lalawigan. Ang alokasyon sa pondo gi-base sa performance sa napiling mga lalawigan nga nisubay sa good governance standards.
Gawas sa good governance standards, miingon si Kalihim Florencio ‘Butch’ Abad sa Department of Budget and Management (DBM) nga ang mga kuwalipikadong lalawigan nakakuha usab sa social development benchmarks ug nakamugna og monitoring ug evaluation mechanisms.
Gitawag nga KALSADA (Konkreto at Ayos na Lansangan at Daan Tungo sa Pangkalahatang Kaunlaran), usa kini ka giingong “innovative devolution program” nga nagtinguha sa pag-institutionalize sa good governance pinaagi sa pagpahimo ug pag-pastol sa local government units sa Local Road Management.
Kining programa mo-rehabilitate ug upgrade sa kadalanan sa mga lalawigan ug ibalhin kining mga kabtangan’g kalsada permanente na ngadto sa provincial government nga mao nay mo-mintinar niini. Paga-ugmaron usab niini ang Provincial Road Network Development Plan alang sa matag probinsiya ug ang pagdasig sa paggamit sa online open data portal isip mekanismo alang sa monitoring ug evaluation sa mga kadalanan sa probinsiya.
Ang maong programa adunay monitoring ug evaluation system aron pagseguro nga ang upgrading ug rehabilitasyon sa mga kadalanan makumpleto gayud. Sa pakig-kolaborasyon sa World Bank ug sa Australian Department of Foreign Affairs and Trade, ang gobyerno nagmugna og sistema nga naggamit sa geo-tagging alang sa reporting sa status sa mga proyekto. Pinaagi usab sa Open Roads Portal, ang publiko makasusi online kun unsang mga dalan ang napili alang sa rehabilitasyon o upgrading ug sundan ang progrero sa road project gikan sa pagsugod ngadto na sa kahumanan niini.
Matud pa ni Bohol Gob. Edgar Chatto, Secretary-General sa League of Provinces of the Philippines ug kampeyon sa KALSADA program, kining maong programa tubag sa General Assembly Resolution sa niaging tuig sa League of the Provinces of the Philippines nga nag-awhag sa DBM ug Department of Interior and Local Government (DILG) sa pagmugna og sumbanan alang sa Provincial Road Network Development Program, gikan sa nakuhang pagtulun-an sa DILG, DFAT ug pakig-kolaborasyon sa pilot LGUs sa Provincial Road Management Facility. (ecb/PIA7-Bohol)
