TAGBILARAN CITY, Bohol, Feb. 25 (PIA)–Gikumpirmar sa Department of Foreign Affairs (DFA) nga may barko nang gipadala aron mopahigayon og “humanitarian mission” aron kuhaon ang mga Pinoy nga tua sa Lahad Datu sa Sabah, Malaysia.
Matud pa ni DFA spokesman Raul Hernandez, gipahibalo na nila ang gobyerno sa Malaysia sa maong lakang sa Pilipinas aron kuhaon ang mga Pinoy ilabi na ang mga kababayen-an, bata ug ang napabalita nga kapin 20 ka mga armado.
Gigamit sa gobyerno ang Navy ship nga AT 296 nga gikan sa Bongao, Tawi-Tawi nga mo-diretso sa Tanduo, Lahad Datu.
Katuyuan sa maong misyon nga maluwas ang mga sibilyan sa posibleng mahitabo kun magkagubot man didto.
Giingong i-posisyon ang barko sa baybayon sa Lahad Datu samtang gipahigayon ang negosasyon.
Sakay sa maong barko ang pipila ka Filipino-Muslim leaders, social worker ug medical personnel.
Apil sa humanitarian mission ang pagpadala og barko human makadawat og report nga may lima ka babaye ug pipila ka sibilyan ang nagpabilin sa Lahad Datu.
Gi-aghat sa DFA ang mga Pinoy nga tua didto nga mosakay na sa barko aron makabalik na sila sa ilang panimalay samtang gi-plantsa pa sa DFA ang isyu sa pag-angkon sa mga Moro sa giingong parte sa Sultanate sa Sulu. (PIA-Bohol/ecb/sjp)