TAGBILARAN CITY, Bohol, May 29 (PIA)–Gi-anunsyo kagahapon ni Presidente Benigno “Noynoy” Aquino III ang kinatibuk-ang P25 bilyon alang sa giingong Philippine Investment Alliance for Infrastructure nga gitakdang ilusad sa Government Service Insurance System (GSIS) sa umaabot nga Hulyo.
Gihimo sa Presidente ang pahayag dungan sa pagtambong niini sa 75th anniversary celebration sa GSIS kagahapon.
Miingon ang Pangulo nga kini na ang pinakadakung pondo nga gigahin alang sa imprastraktura sa nasud ug pagadumalaon kini sa Macquire Group.
Gipaabot nga magpalambo pa kini sa ekonomiya sa nasud ug makamugna og dugang nga mga trabaho.
Sa niaging tuig, nakatala ang GSIS og kinatibuk-ang P60.4 bilyon sa net revenues.
Base sa GSIS Charter, mahimong mo invest sa pension fund state securities, equities ug sa ubang government-owned and controlled corporations.
“This is the biggest fund that we have allocated for infrastructure projects in the country. The GSIS led the creation of this fund which will be managed by the Macquire Group,” matud pa ni Presidente Aquino. (PIA-Bohol/ecb)
Gobyerno sa China, uyon sa bag-ong PH envoy
TAGBILARAN CITY, Bohol, May 29 (PIA)–Nagpahayag og hingpit nga pagsalig ang Chinese government sa katakus sa bag-ong gitudlong Philippine Ambassador to China nga si Sonia Brady aron mas mapalig-on pa ang bi-lateral relations sa duha ka nasud.
Gipahayag ni Chinese Foreign Ministry spokesman Liu Weimin nga naglaum sila nga sa mas daling panahon, masugdan na ni Brady ang iyang trabaho.
“We welcome the Philippine government to send the ambassador to Beijing as soon as possible, and we believe it will help strengthen communications between both sides through diplomatic channels,” matud pa sa opisyal.
Una nang gipa-ila sa Malacañang ang pagkatudlo kang Sonia C. Brady isip bag-ong Philippine ambassador to People’s Republic of China isip hulip ni Domingo Lee nga pakyas sa paglusot sa Commission on Appointments (CA).
Si Brady ang kanhi ambassador to China niadtong 2006 hangtud 2010, panahon ni kanhi Presidente Gloria Arroyo.
Sa wala pa ang appointment ni Brady, gikalipay usab sa China ang pagkatudlo ni Presidente Benigno Aquino III sa duha ka special envoy to China nga sila si Cesar Zalamea ug Philippine-Chinese business leader Domingo Lee. (PIA-Bohol/ecb)
PRESS RELEASE
Philippine Information Agency
Tagbilaran City Information Center
411-2292/ 501-8554/ 0920 954 5482 email piabohol171@yahoo.com
Bohol nakadawat og Seal of Good Housekeeping sa DILG
TAGBILARAN CITY, Bohol, May 29 (PIA)–Nakadawat ang lalawigan sa Bohol og pasidungog nga Seal of Good Housekeeping gikan mismo kang Kalihim Jesse Robredo sa Department of Interior and Local Government (DILG).
Matud pa ni Robredo nga ang pasidungog nagpamatuod lamang nga gipatuman sa mga kadagkuan sa Bohol ang “mahusay at matino” nga awhag nga gipakadak-an sa administrasyon ni Presidente Benigno “Noynoy” Aquino III.
Gidayeg ni Robredo ang pagdumala ni Gob. Edgar M. Chatto ilabi na kabahin sa Purok Power Movement o ang Countryside Development Program-Purok Power Movement (CDP-PPM) nga programang mopalig-on ug mopalambo sa katawhan sa kabaranggayan.
Nakadawat usab sa maong pasidungog ang mga lungsod sa Albur, Baclayon, Bilar, Antequera. Buenavista, Talibon, Trinidad, Jagna, Ubay, Bien Unido, Calape, Catigbian, Corella, Danao, Dimiao, Garcia-Hernandez, Sikatuna, Tubigon, Guindulman, Inabanga, Getafae, Lila, Loon, Sagbayan, San Isidro, Sevilla, ug Valencia. (Elvira Bongosia)