TAGBILARAN CITY, Bohol, April 24 (PIA)–Tungod sa pagkamalampuson sa Jobs Bridging Program sa Technical Education and Skills Development Authority (TESDA) nga Hanapbuhay Para sa TESDA Especialista didto sa kaulohan, gilusad usab kini sa lalawigan sa Bohol kagahapong adlawa didto sa Bohol Cultural Center.
Gipangunahan ang maong kalihokan nilang TESDA Provincial Director Francisca Opog, Regional Director Rosanna Urdaneta, Gob. Edgar Chatto ug Secretary Joel Villanueva.
Gilusad usab kini dinhi sa Bohol aron pagpakuyanap sa ilang Jobs Bridging Program aron makatabang og ayuda sa mga yanong kabataang Bol-anon nga gustong makalampos sa ilang pagtuon pinaagi sa pagkuha og mga vocational nga kurso.
Gidala sa TESDA dinhi sa Bohol ang ilang programa tungod sa dakung suporta nga nadawat sa ilang buhatan gikan sa kagamhanang probinsiyal ubos sa pagdumala ni Gov. Chatto ug Vice Gob. Conchita Lim.
Gidayeg ni Sec. Villanueva ang lalawigan sa Bohol tungod sa pag-angkon og usa ka gobernador nga kugihan ug hugot ang gihimong paningkamot ug pakiglambigit sa TESDA alang sa kaayohan sa katawhan. Tungod niini, nahimong TESDA Kabalikat Awardee si Gob. Chatto.
Si Gob. Chatto sa iyang bahin nagpasalamat sa TESDA sa padayon nga pagpalambo sa skills development ug padayon nga pakigtambayayong sa kagamhanang probinsiyal.
Atol sa gipahigayong press conference kagahapon, gituki nilang Sec. Villanueva ug Gob. Chatto ang pagkamahinungdanon sa mga technical ug vocational nga kurso nga gitawag og Tech-Voc.
Ilang gipasabot nga kini ang mga alternatibong kurso nga mahimong kuhaon sa mga estudyante aron mapalambo ang ilang panginabuhian sa umaabot nga panahon inabagan sa TESDA ug kagamhanang probinsiyal.
Gipahigayon usab sa maong kalihokan ang Pre-Employment Seminar (PES) nga gipangunahan sa mga buhatan sa Department of Labor and Employment (DOLE) ug Bohol Employment and Placement Office (BEPO).
Ang mga dagkung kumpanya ug magpapatigayon dinhi sa Bohol ug apil na usab sa mga silingang lalawigan nisalmot usab sa maong programa sama sa Alturas Group of Companies, Bohol Quality Corporation, CYDEM, Dumaluan Beach Resort, Du Ek Sam, Bohol Tropics, Save N’ Earn, JJ’s Dimsum, JJ’s Seafood Village, Reynas the Haven Resort and Restaurant, Water Paradise Resort, Dranix, Cebu Mitsumi, Aegis People Support, Teletech Dumaguete, Stream Global Services ug Convergys.
Sa tuig 2012, nakahatag ang TESDA og 2,542 ka scholarship vouchers nga nagkantidad og P15.4 milyon. (PIA-Bohol/ecb/p-hd)