MANILA, June 09 (PIA)–Gipahinumdoman sa Department of Labor and Employment (DOLE) nga may madawat pa gihapon ang mga mamumuo nga dili mosulod o naka-leave sa trabaho sa Hunyo 12 tungod kay deklarado man kining regular holiday.
Sa holiday pay advisory sa buhatan alang sa mga pribadong kumpanya, nakalatid nga bayaran pa gihapon og kapareho ang kinatibuk-ang sweldo sa mga dili mosulod sa trabaho sa Independence Day.
Kun mosulod usab ang empleyado sa maong petsa, makadawat kini og doble sa regular nga suholan alang sa unang walong oras ug dugang nga 30% sa hourly rate kun mag-overtime kini.
Kun matunong sa day off sa empleyado ang Hunyo 12 ug musolod pa gihapon kini sa trabaho, kinahanglan siyang hatagan sa kumpanya og umentong 30% sa iyang gi-doble nga daily rate.
Gawas pa niini ang dugang 30% sa matag oras nga overtime nga isulod sa empleyado.
Nanghinaot ang DOLE nga mosunod niini ang mga employers sa pribadong sektor.
Sa Biyernes, isaulog sa nasud ang 117th Independence Day. (ecb/PIA7-Bohol)
