TAGBILARAN CITY, July 20 (PIA)–Isaulog sa lalawigan sa Bohol ang ika-162 nga Foundation Day niini karong Hulyo 22, Biyernes.
Ubos sa Republic Act No. 7683, matag 22 sa Hulyo, gi-deklarar nga non-working special public holiday sa tibuok lalawigan sa Bohol, apil na ang syudad sa Tagbilaran agi og pagsaulog sa Bohol Day.
Nagdala sa tema nga “A Celebration of Bohol Cultural Identity and Creative Talent,” ang kasaulogan pagabuksan pinaagi sa Misa Pasalamt sa may alas 7:15 sa buntag sa St. Joseph Cathedral ning dakbayan.
Isunod dayon ang usa ka commemorative program nga ipahigayon sa Bohol Cultural Center.
Pinasidunggang dinapit sa maong kasaulogan si Atty. Julito Vitorillo, ang Executive Director sa Commission on Higher Education (CHED).
Sa maong adlaw usab ilusad ang Tigum-Bol-anon Tibuok Pilipinas (TBTP).
Gitakdang pasidunggan sa lalawigan sa Bohol sa pagpanguna ni Gob. Edgar Chatto ang 5 ka mga outstanding outstanding Bol-anon atol sa maong selebrasyon.
Gitawag nga Governor’s Award, kining espesyal nga pasidunggog ihatag sa mga Bol-anon nga nakakulit na sa ilang pangalan sa nagkalain-laing natad sa ilang paninguha.
Apil sa hatagan sa Governor’s Award mao si Engr. Arnold Labunog, Dr. Wilson Du ug Engr. Fortunato Lim sa natad sa Business.
Samtang si Rainerio Balbin pasidunggan sa natad sa Musika ug si Paul Jumamil sa natad sa Sports. (ecb/PIA7-Bohol)