ESPESYAL nga holiday sa Bohol karong umaabot nga Martes, Hulyo 22, kanus-a saulogon ang ika 154 nga Bohol Day.
Tungod niini, walay trabaho alang sa mga trabahante ug walay klase sa tanang ang-ang sa pagtuon.
Kahinumduman na sa Hulyo 22, 1854, nakabaton ug kaugaling-nan ang Bohol kauban ang Siquijor dihang gibuwag kini sa lalawigan sa Sugbo,
Sukad niini, gi-isip na ang Bohol sa kanhi kagamhanang Katsila nga lahi nga lalawigan ug misanong usab ang misunod nga rehimen sa mga Amerikano.
Pinaagi usab sa Akta Republika 7683, gideklara na sa Kongreso nga espesyal nga holiday sa tibuok Bohol ug syudad sa Tagbilaran ang Hulyo 22.
Sa laing bahin, giandam na sa Kapitolyo ang mga kalihukan nga subay sa pagsaulog niini.
Sumala sa memorandum ni Acting Governor Julius Caesar Herrea, human sa alas 7:30 nga pagpataas sa bandila ug pagtukas sa marker sa water treatment facility sa Kapitolyo didto sa Plaza Rizal, mosunod ang santos nga misa ug commemorative program didto sa Bohol Cultural Center.
Gipaabot nga ika-uban sa mga Bol-anon si Vise Presidente Noli de Castro isip Guest of Honor ug mamumulong sa maong adlaw.
Itanyag usab alang sa mga pinili nga dinapit ang Datu Sikatuna Awards alang sa outstanding nga mga tawo ug institusyon.
Sa ika ala una sa hapon, ang kalihukan mobalhin ngadto sa Tagbilaran City Hall alang sa Bull Ride Fun ug mga kulturanhong pasundayag inig ka gabii. (rachiu/PIA)