TAGBILARAN CITY, October 18 (PIA)–Gi-deklarar ang bulan sa Oktubre ubos sa Presidential Proclamation No. 647 isip National Statistics Month. Una kining gisaulog niadtong tuig 1990 ug ika-27 na ka tuig kining gisaulog karon.
Nagdala sa tema nga: “Sustainable Development: Making Statistics Count”, kini magpatugbaw sa kritikal nga papel sa estatistika sa pag-monitor sa progreso sa nasod paingon sa pagkab-ot sa Sustainable Development Goals.
Si Philippine Statistics Authority Bohol Provincial Head Jessamyn Anne Alcazaren nibutyag nga usa sa mga kalihokan sa selebrasyon mao ang pagpakatap sa resulta sa 2015 Census of Population (POPCEN) nga ipahigayon sa Oktubre 21 sa Kew Hotel ning dakbayan.
Ang labing ulahing population levels ug trends tadlas sa rehiyon ug probinsiya sa nasod ibutyag usab dinhi.
Gawas niini, may poster making ug painting contest usab nga ipahigayon sa Oktubre 20.
Kining contest abli sa tanang junior ug senior high school students nga nagtungha sa pam-publiko ug pribadong tunghaan sa syudad sa Tagbilaran.
Alang sa dugang kasayoran, mahimong motawag lamang sa buhatan sa PSA sa telepono 501-0996 ug pangitaa lamang si Xina Ixora Aranas o mahimo usab mo-email kanila sa psa07.bohol@gmail.com.
Gi-awhag ang tanang kawani sa ahensiya sa gobyerno ug lokal nga kagamhanan sa pagsalmot niining selebrasyon nga nagtinguha sa pagdasig ug pagpausbaw sa kaamgohan ug kamahinungdanon sa estatistika ngadto sa nagkalain-lang sektor sa katilingban ug pagkuha og suporta sa publiko sa pagpa-usabaw sa kalidad sa estatistika sa nasod.
Sa ilang mandato isip nag-unang ‘statistical arm’ sa gobyerno, ang PSA nagdala og krusyal nga papel sa paghatod og untop ug kasaligang estatistika. (ecb/PIA7-Bohol)