TAGBILARAN CITY, July 25 (PIA)–Gawasnon nang makuha, mahibalo ug masusi sa publiko ang tanang mga impormasyon sa mga transaksyon ug patigayon sa gobyerno.
Kini human gilagdaan ni Presidente Rodrigo Duterte ang Executive Order (EO) alang sa gipaabot nga Freedom Of Information (FOI) nga pakyas mapalabang isip balaod sa niaging Aquino administration.
Sakop sa FOI Executive Order ang tanang departamento, bureau, agencies ug buhatan ubos sa Executive Branch.
Apan exempted sa maong EO ang mga buhatan o public records nga kompidensiyal o dili pang-publiko sigon sa Batakang Balaod.
Tungod niini, gimanduan ang Office of the Solicitor General (SolGen) ug Department of Justice (DoJ) sa pagpahigayon og inventory sa mga impormasyong exempted sa EO ug isumiter kini sa Office of the President (OP) human sa 30 ka adlaw sugod sa pagpatuman niini.
Ang bisan kinsang mangayo og public records, datos o impormasyon angay mosulat sa hingtungdang buhatan ug ibutang ang pangalan, contact information, pagmatuod sa kailhanan o authorization ug klarong hinungdan o gamitan sa gipangayong impormasyon o rekord.
Libre ang pag-request sa public records/information ug may bayad lamang sa gasto sa reproduction o pagpakopya sa maong mga dokumento.
Kun balibaran ang gipangayong impormasyon o dokumento, gi-obligar ang hingtungdang buhatan sa pagsulat (letter of denial) sa requesting party human sa 15 ka adlaw gikan sa pagkadawat sa request letter ug i-detalye ang hinungdan sa pagbalibad niini.
Alang sa epektibong pagpatuman sa FOI, gimanduan ang tanang buhatan sa gobyerno sa pag-andam o pagmugna og kaugalinong FOI Manual sulod sa 20 ka adlaw gikan sa paglagda sa executive order. (ecb/PIA7-Bohol)