TAGBILARAN CITY, Bohol, April 25 (PIA)–Pormal nang gilusad sa gobyerno ang K to 12 basic education program sa usa ka seremonya sa Malakanyang kagahapon.
Gipangunahan ni Presidente Benigno “Noynoy” Aquino ang ceremonial turnover sa curriculum alang sa Grade 1 ug Grade 7 sa pipila ka piniling estudyante sa elementary ug high school.
Kumbinsido ang Presidente nga mas mahimong competitive na ang mga tinun-an ug mas daling makakita og trabaho tungod sa K to 12 basic education.
Sa K to 12 program, madugangan og duha ka tuig ang basic education o aduna nay Grade 11 ug Grade 12 o senior high school diin andam nang motrabaho ang makahuman sa Grade 12.
Ipatuman na ang bag-ong kurikulum sa tanang publikong elementary ug high school sa tibuok nasud karong school year 2012-2013.
Matud pa ni Department of Education Secretary Armin Luistro nga dili pa perpekto ang bag-ong sistema apan giingong i-monitor sa buhatan ang unang tuig sa implementasyon niini aron makita ang mga angay pang i-improve.
Giingong tungod sa bag-ong teknolohiya, angay mosunod na ang Pilipinas sa pagpalambo sa edukasyon ilabi na nga ang atong nasud na lamang sa Asya ang adunay 10-years basic education.
Giseguro usab ni Luistro nga wala nay kakulangan sa mga libro ug lingkuranan sa mga classroom sa pagbukas sa klase sa Hunyo. (PIA-Bohol/ecb)
Gobyerno, adunay igong pondo alang sa ‘just compensation’ – DAR
TAGBILARAN CITY, Bohol, April 25 (PIA)–Giseguro karon sa Department of Agrarian Reform (DAR) nga adunay igong pondo ang gobyerno aron bayaran ang Hacienda Luisita Incorporated, agig pagsunod sa gitakda sa Supreme Court nga just compensation.
Matud pa ni DAR Sec. Virgilio delos Reyes, nahisulod ang pondo ubos sa 2011 ug 2012 national budget.
“There is money that was provided for in the budget of 2011 and 2012. Enough to be able to acquire the land that should be covered under the CARP (Comprehensive Agrarian Reform Program).
Kalabot niini, giseguro usab ni Sec. Delos Reyes nga agig pagsunod sa CARP law, giingong makalaum ang mga mag-uuma og “support services” gikan sa gobyerno.
Samtang gipahinumdoman usab sa opisyal nga base sa gitakda sa balaod, dili mahimong ibaligya sa mga farmer-beneficiaries ang madawat nilang bahin sa yuta sulod sa 10 ka tuig. (PIA-Bohol/ecb)