TAGBILARAN CITY, Bohol, Dec. 13 (PIA)–Mikabat na sa kapin P15 bilyon ang kantidad sa kadaut nga gibilin sa Bagyong Pablo sa nasud.
Base sa talaan sa National Disaster Risk Reduction and Management Council (NDRRMC) ganinang alas-10:00 sa buntag, mokabat sa P15,109,881,128.05 ang kinatibuk-ang kadaut sa bagyo.
P9,695,372,515.05 sa maong kantidad ang kadaut ni “Pablo” sa agrikultura apil na ang mga dagkung sagingan sa Davao region samtang P5,365,549,200 ang kadaut sa bagyo sa mga imprastrakturang gipanag-iya sa gobyerno.
Halos 50 milyon usab niini ang sa mga pribadong kabtangan nga nadaut ni “Pablo.”
Gibanabanang mokabat usab sa 148,887 ang gidaghanon sa mga nagubang balay ug 528,750 ka pamilya ang apektado sa bagyo. (PIA-Bohol/ecb/I-cc)
