Gi-aprobahan ni Presidente Gloria Macapagal-Arroyo ang paggahin og P1.68-bilyones isip ‘subsidy’ sa mga mag-uuma para sa paggamit ug pagapod-apod og ‘certified’ nga klase sa humay sa tibuok nasud. Mao kini ang gibutyag ni Kalihim sa Agrikultura Arthur Yap.
Matud pa ni Yap, ang kantidad gamiton sa pagpalit og 1.4 milyones ka sako nga ‘certified seeds’ para itanum sa 1.4 milyones hektarias nga ‘irrigated ug rainfed’ nga umahan ta tibuok nasud karon 2008-2009 nga panahon sa igtanumay.
Dugang pa niini, matud pa sa Kalihim, ang Lang Bank of the Philippines mogahin usab og P7-bilyones nga ‘micro-finance’ nga pahuwam sa mga mag-uuma nga makadawat niining certified nga klase sa humay aron pagpalig-on ug pagpadaghan sa ani sa ilang humay.
Ang kada sako sa ‘certified palay seeds’ ubos niining ‘subsidy’ nga programa, maka-ani hangtud sa 120 ka sako nga palay o 60 sako sa ginaling nga bugas.
Gipatin-aw usab ni Yap, isip pagsanong sa direktiba sa Presidente, ang DA usab mohatag og ‘incentive’ o pahalipay sa mga mag-uuma nga mobaligya sa ilang humay sa National Food Authority (NFA).
Sa maong ‘incentive’ nga programa, ang mag-uuma nga mobaligya sa og 50 ka sako o 500,000 metriko tonelada nga humay sa NFA, gahinan sila ug P1,800 nga ‘rebate’, diin magamit kini sa mag-uuma sa pagpalit og abuno ug ubang mga panginahanglanon sa pag-uma.
Ang pundo sa maong programa pagkuhaon gikan sa koleksyon sa buhis, labina sa Expanded Value Tax (EVAT).
Ang programa sa ‘subsidy’ apil sa misyon sa DA aron makab-ot sa nasud ang ‘rice self-sufficiency’ sa tuig 2013, apas sumpay ni Yap. (PIA/Bohol)
