TAGBILARAN CITY, June 16 (PIA)–Giduyogan sa kagamhanan sa Bohol, gipangandaman na karon sa Bohol Federation of Disabled Persons (BFDP) kauban ang nagkalain-laing ahensiya sa gobyerno ang kalihokan sa pag-obserba sa ika-38 nga National Disability Prevention and Rehabilitation (NDPR) Week gikan sa Hulyo 17 ngadto sa 23 ning tuig.
Sa meeting nga gipahigayon kagahapon nga gipangunahan ni BFDP president Mateo “Toting” Quilas, nauyonan nga ang kalihokan sa NDPR Week dinhi sa lalawigan sa Bohol buksan sa Hulyo 18 (Lunes) sa usa ka balaang misa sa alas 7:30 sa buntag sa St. Joseph Cathedral.
Human sa misa, isunod dayon ang motorcade gikan sa St. Joseph Cathedral paingon sa Bohol Cultural Center diin didto ipahigayon ang opening program.
Sa hapon, ipahigayon ang symposium diin naglaian-laing mamumulong ang dapiton nga motuki sa mga katungod sa mga persons with disability (PWDs).
Gitakdang magtigom og balik ang grupo alang sa dugang ug pinal nga mga kalihokan alang sa NDPR Week karong umaabot Hulyo 6 didto sa Conference Room sa Governor’s Mansion.
Nag-unang tumong sa kasaulogan ang dugang pagdasig sa pagpakabana sa publiko diha sa mga isyu sa mga PWD’s ug pag-abag nga madugangan ang ilang kahibalo kalabot sa ilang mga katungod.
Isaulog ang NDPR Week ning tuiga sa pagpanguna sa Commission on Human Rights (CHR) ubos sa tema nga: “Karapatan Ng May Kapansanan, Isakatuparan, Now Na!” (ecb/PIA7-Bohol)