MANILA, Dec. 02 (PIA)–Mas hingusgan pa sa Pilipinas ang kampanya niini batok sa Ebola virus aron dili kini makasulod sa nasud taliwala sa taho sa World Health Organization (WHO) nga mikabat na sa 7,000 ang namatay tungod sa maong sakit.
Matud pa sa WHO, mokabat na sa 16,169 ang mga kaso sa Ebola Virus Disease (EVD) ug 6,928 niini ang namatay gikan sa tulo ka nasud nga gi-ilang sentro sa outbreak — ang Sierra Leone, Guinea ug Liberia.
“Patuloy pong pinala¬lakas ang ating kapasidad na magkaroon ng sapat at angkop na katugunan sa banta ng Ebola virus disease,” matud pa ni Presidential Communication Operations Office (PCOO) Secretary Herminio ‘Sonny’ Coloma Jr.
Matud pa sa kalihim, tanang aspeto sa pagdepensa gikan sa information ug awareness campaign, pagbaton og surveillance ug monitoring sa mga tugpahanan ug pantalan ang gihimo na sa gobyerno aron masiguro nga dili makasulod sa nasud ang maong sakit.
Apil usab sa gihimo sa gobyerno ang paghatag og training sa mga health workers ug caregivers ug pag-andam sa mga pasilidad.
“Lahat po ng mga ito ay patuloy at puspusang isinasagawa ng ating Department of Health at sinusunod po ‘yung mga pinapairal na mga health protocol ng World Health Organization,” dugang pa ni Coloma.
Tungod niini, nanawagan ang Palasyo sa katawhan nga makighiusa sa mga lakang sa gobyerno tungod kay giingong dili lamang responsibilidad sa gobyerno ang maong butang apan responsibilidad sa tanang katawhan. (ecb/PIA7-Bohol)
