TAGBILARAN CITY, April 04 (PIA)–Gilusad karong adlawa sa Department of Social Welfare and Development (DSWD) ang ilang kampanyang “Tuloy Ang Pagbabago.”
Gisugdan kini sa usa ka parada nga nagsugod gikan sa Plaza Rizal paingon sa Bohol Tropics nga gisalmotan sa dul-an 500 ka mga partisipante nga gilangkoban sa mga partner-beneficiaries, civil society ug mga kawani sa DSWD.
Gisundan dayon kini og hamubong programa pag-abot sa Bohol Tropics.
Si Pantawid Pamilya Regional Program Coordinator, Raquel Enriquez ang nihatag sa welcome message diin iyang gipa-ambit ang mga positibong nakuha sa mga benepisyaryo sa Pantawid Pamilyang Pilipino Program (4Ps).
Samtang si Herminia Cabahug, chief sa General Admin. and Support Office sa DSWD, mipatin-aw nga walay katungod o gahom ang mga opisyal sa barangay nga tangtangon sa listahan ang mga benepisaryo sa 4Ps.
Gitataw ni Cabahug nga ang pagpabilin sa listahan sa mga benepisaryo nag-agad sa pagsunod nila sa mga kondisyon sa programa ug dili sa desisyon sa bisan kinsang lokal nga opisyal.
Gipangunahan ni Cabahug ang paglagda sa commitment tarpaulin alang sa Pantawid Pamilya Frequently Encountered Situation Book (FESBook).
Ang Huwarang Pantawid Pamilya nila Pepe ug Josefina Torrentira gikan sa lungsod sa Sagbayan kauban ang ilang mga anak mipa-ambit usab sa ilang estorya sa kausaban.
Ang Tuloy Ang Pagbabago usa ka communication campaign nga nagtinguha sa pagpanalipod ug pagpausbaw sa kaamgohan sa katungod ug obligasyon sa mga benepisyaryo, ilabi na sa nagsingabot nga nasudnong piniliay.
Pinaagi sa maong kampanya, ang mga partner-beneficiaries gipaabot nga mahimong mas maigmaton ug maalamon ilabi na sa ilang katungod isip lungsoranon.
Ang maong kampanya, nagtinguha usab sa pagdasig sa mga benepisyaryo nga mahimong aktibo sa pagsalmot sa eleksiyon, paghatag kanila og kapasidad sa pagpadayag ug pagbarug sa ilang mga katungod.
Sukad Marso 2016, adunay 59,994 ka pantawid households sa lalawigan sa Bohol. (ecb/PIA7-Bohol)