TAGBILARAN CITY, Bohol, Jan. 25 (PIA)–HINGPIT nang balaod ang Kasambahay Bill nga maghatag og proteksyon ug benepisyo sa mga household helpers human gilagdaan ni Presidente Benigno “Noynoy” Aquino III ang Republic Act 10361 o “An Act Instituting Policies for the Protection and Welfare of Domestic Workers”.
Ang Kasambahay Bill nga kaniadto pang Disyembre 2012 napasar sa Kongreso, gilagdaan sa Presidente niadtong Enero 18.
Matud pa ni Deputy Presidential Spokesperson Abegail Valte, nalangan ang pagpadala sa Malakanyang tungod kay gikinahanglan pa kining mo-agi sa mga proseso sa dili pa moabot sa buhatan sa Presidente.
Ubos sa maong balaod, makadawat og P2,500 nga minimum nga suholan ang mga katabang sa National Capital Region (NCR), P2,000 sa mga chartered cities ug first class municipalities, samtang P1,500 usab sa ubang syudad ug kalungsoran.
Obligado na usab ang mga amo nga mohatag og 13th month pay sa ilang katabang kun usa ka tuig na kining nanilbihan ug lima ka adlaw nga leave with pay sulod sa usa ka tuig.
Ang mga employer kinahanglan sa usab nga adunay kontrata sa mga katabang ug ipatala ang pangalan niini sa barangay.
Angay usab nga hatagan og mga social benefit ang mga katabang sama sa Social Security System, PhilHealth ug Pag-IBIG FUND.
Gidili na usab ang pagkuha og katabang nga ang mga edad naa sa 15 anyos paubos.
Epektibo na sa Pebrero 3 ang pagpatuman niining bag-ong balaod human kini gilagdaan sa Presidente niadtong Enero 18 ug i-post sa Official Gazette diin 15 ka adlaw lang ang gikinahanglan aron mahimong epektibo kini.
Gibanabanang naa sa 2.9 milyong domestic workers sa tibuok nasud nga gilangkoban sa mga yaya, cook, labandera, hardinero ug family driver ang makapahimos sa bag-ong balaod. (PIA-Bohol/ecb/i-hd)