KABABAYEN-ANG makatabang na sa kita sa pamilya, kini maoy bungat-pasalamat ni Roberta Sayson, usa ka Bol-anong tigpanghimo ug bawjot nga natabangan sa bansay sa pagpanghimo ug bayong o bawjot.
Pinaagi sa Department of Trade and Industry, si Sayson kauban sa gatusan ka kababayen-an sa Talibon, Bien Unido, Trinidad ug Carlos P Garcia nabansay sa pagsibit ug bawjot agi ug dugang kapanginabuhian.
Matud ni DTI Reg. Director Asteria Caberte, ang Project Bayong paagi sa kagamhanan aron katanyagag dugang kita ang banay aron magpabiling mapanalipdan sa nagkalapad nga krisis ekonomikanhon.
Matud pa sa 2009 Labor Force Survey, 12.1M na ka Pinoy ang nakapasugod nag trabaho o nakatrabaho sa ilang kaugalingong negosyo.
Niini, mitibugsok na usab ang unemployment rate sa Abril 2009 ngadto sa 7.5% gikan sa 8% sa milabayng tuig. (PIA)
