MANILA, May 13 (PIA)–Giisa karong adlawa sa Philippine Atmospheric, Geophysical and Astronomical Services Administration (PAGASA) ang La Niña Watch agi og pag-awhag sa mga ahensiya sa gobyerno sa pagpangandam sa nagsingabot nga climate pattern nga binali sa nasinati nato karong El Niño.
Sa ilang pinakaulahiang advisory, ang PAGASA miingon nga ang El Niño padayong nagkahinay sa tropical Pacific, samtang adunay posibilidad sa nagsingabot nga La Niña nga matud pa hinay-hinay nga masinati sa tunga-tunga sa ikaduhang semester sa 2016.
Gipaabot nga masinati kini sa mga buwan sa Hunyo, Hulyo ug Agosto.
“It is better for the national government to prepare for another extreme weather event,” matud pa ni Anthony Lucero, Chief sa Climate Monitoring and Prediction Section sa PAGASA.
Giingong mahimong mosobra sa normal ang ulan sa daghang parte sa nasod sa mga mosunod nga buwan ug mas mokusog pa kini sa buwan sa Disyembre.
Human sa dautang epekto sa El Niño, giingong mosunod niini ang La Niña nga usa ka abnormal nga kondisyon sa panahon tungod sa global warming nga magdala og kusog nga ulan ug bagyo.
Ang La Nina magdala og sobrang pagbobo sa ulan nga hinungdan sa pagbaha. Daghang bagyo ang masinati niining panahona. (ecb/PIA7-Bohol)