TAGBILARAN CITY, Bohol, Mar. 12 (PIA)–Human sa MS “Europa” ug “Minerva,” laing cruise ship na usab ang gitakdang modunggo sa pantalan sa Tagbilaran ugmang adlawa, Marso 13, 2015.
Ang L’ Austral nga gidumala sa French Shipping Company Compagnie Du Ponant mahidangat dinhi sa syudad ugma sa alas 7:30 sa buntag.
Ang lalawigan sa Bohol maoy labing unang port of call sa maiden voyage niini sa Pilipinas.
Ang maong cruise ship naggikan sa Darwin, nasud sa Australia ug nihapit sa Indonesia ug Malaysia usa mahidangat dinhi sa Pilipinas.
Ang maong barko adunay 264 ka pasahero, kasagaran French nationals, ug may 150 ka crew staff kini.
Niadtong Mayo 2011, ang L’Austral niapil sa Ponant’s fleet.
Samtang nia sa Bohol, masinati sa mga turistang sakay sa maong cruise ship ang Bohol Countryside Tour nga naglakip sa Loboc river cruise ug Abatan Community life tour. (ecb/PIA7-Bohol)
