TAGBILARAN CITY, Bohol, Aug. 14 (PIA)–Adunay programa karon ang Philippine Coconut Authority (PCA) nga manghatag og lubi.
Kini ang gipahibalo ni Jose Allan Cajilog, ang tigpamaba sa PCA atol sa information sharing sa mga miyembro sa Association of United Development Information Officers in Bohol (AUDIO-Bohol) sa ilang panagtapok niadtong Huwebes sa JJ’s Dimsum Restaurant.
Ang maong programa nga coconut seedling dispersal project sa PCA manghatag og mga libreng dwarf seed nuts sa lubi.
Matud pa ni Cajilog nga kadtong interesadong mangayo, mahimong moadto sa ilang mga lokal nga Municipal Agriculture Office (MAO) sa ilang lungsod.
Kini tungod kay ang mga PCA Coconut Development Officers naggunit naman og upat hangtud lima ka lungsod mao nga direkta na silang nakig-coordinate sa mga MAOs, sigun pa ni Cajilog.
Gawas niini, aduna usab dwarf coconut tree planting project ang kagamhanang probinsiyal diin gi-implementar kini sa pakig-abag sa PCA.
Dinhi, nangita ang kagamhanang probinsiyal og mga viable nga organisasyon ilabi na kadtong mga small coconut farmers association sa butahan sa PCA nga ilang gi-asistahan.
Ang kagamhanang probinsiyal ang mohatag sa mga organisasyon sa mga dwarf seed nuts nga ilang paturokon.
Maghimo lamang sila og nursery ug kadtong mga moturok nga seed nuts, bayaran pa gyud sa kagamhanang probinsiyal og P10.00 matag usa.
Kining maayong programa agi ug pagdasig sa mga mag-uuma sa pagtanom og mga lubi.
Kadtong ma-produce nga mga seedlings sa nursery sa mga organisasyon, ipanghatag ra usab kini sa mga katawhan nga interesadong magtanom.
Alang niining programaha, makig-coordinate lamang sa mga lokal nga MAO sa kalungsoran o moadto mismo sa mga Coconut Officers sa PCA ug libre lamang kining tanan.
Ang dwarf o mugbo nga lubi gi-promote karon sa kagamhanang probinsiyal tungod kay daghang mga investors nga nisulod sa Bohol ang nangita og mga continuous dwarf coconut population tungod sa kakusog sa demand sa coco sugar sa gawas sa nasud. (PIA-Bohol/ecb)
