TAGBILARAN CITY, July 26 (PIA)–Giseguro kagahapon ni Presidente Rodrigo Duterte sa iyang unang State of the Nation Address (SONA) ang 101 porsiyentong limpyo nga pangagamhanan sa iyang administrasyon.
Samtang hugot usab niyang gipasidan-an ang mga kawani ug opisyal sa gobyerno batok sa korapsiyon.
Matud pa sa Presidente, kun may madungog siyang sumbong o hunghong batok sa taga-gobyerno, iya dayon kining tangtangon sa puwesto.
“Kapag may marinig ako sa Executive Department, even a whisper, even a whisper, hiwalay-hiwalay na tayo. Marami diyan, diyan sa gallery marami diyan walang trabaho, nag-aaply hanggang ngayon. Hindi naman lahat kasi mayayaman yan eh. Mga asawa ninyo ata ‘yan,” matud pa ni Duterte.
Sama sa gilaoman, nahimong sentro gihapon sa SONA sa Presidente ang kampanya sa gobyerno batok sa ilegal nga droga nga una na niyang gisaad niadtong eleksiyon.
Gimando sa Presidente sa Philippine National Police (PNP) ang total war sa mga drug financier ug gipabantayan bisan ang performance sa mga local government units.
Kalabot niini, gitahasan ni Duterte ang National Police Commission (NAPOLCOM) nga paspasan ang imbestigasyon ug pagresolba sa administrative cases sa mga police officers nga nalambigit sa kriminal ug ilegal nga kalihokan.
Gimando usab niya ang pagmugna og polisiya alang sa lifestyle check sa mga miyembro sa PNP.
Gipahayag usab ni Duterte nga himuong rehab haven ang mga kampo sa militar alang na usab sa seguridad sa mga nitahan nga adik ug mga nadakpang drug pushers.
Banhawon usab ang nagkahinay nga ROTC ug gamiton ang mga reservists aron i-mobilize sa kampanya batok sa ilegal nga droga.
Imbes nga kaltoan og walo ka minuto lamang sama sa gipahayag sa Malakanyang, nikabat sa usa ka oras ug kuwarenta minuto ang nahimong SONA sa Presidente. (ecb/PIA7-Bohol)