TAGBILARAN CITY, Oct. 03–Mokusog pa ug gipaabot nga mahimong tropical depression na ugma, adlaw nga Martes, ug hinganlan’g Bagyong Ramon ang nasigpatang Low Pressure Area (LPA) sa Visayas. Matud pa ni Department of Science an Technology (DOST) Undersecretary ug PAGASA Officer-in-Charge Graciano Yumul, nasulod ang LPA sa Inter Tropical Convergence Zone (ITCZ) nga naka-apekto sa Southern Luzon, Visayas ug Mindanao. Giingon nga kun walay pagbag-o sa lihok niini, posibleng maigo ni Ramon ang Batanes sa Biyernes o Sabado sa dili pa kini mosulod sa West Philippine Sea. Daku ang posibilidad nga maghatag ang Bagyong Ramon og mga pag-ulan sa Northern Luzon apil na ang Cagayan ug Isabela tungod sa dakong dayametro sa mga bagyong mosulod sa nasud sama nila Pedring ug Quiel. Tungod niini, nipasidaan ang Pagasa sa mga residenteng anaa sa kasadpang bahin sa Luzon ug Visayas batok sa storm surge o kusog nga paghapak sa balod sa mga kabaybayonan nga dala sa hanging habagat. (PIA-Bohol/ecb)
