LAKANG sa tukmang direksyon, kini maoy gibungat sa mga maglulubi dihang gi-butyag ni Presidente Gloria Macapagal Arroyo ang pagsulod sa Koreano nga kompanya sa coconut based sweetener dinhi.
Kini usab samtang gipalig-on ni Bise Gobernador Julius Caesar Herrera ang pagpahiuli sa kalubihan sa Bohol human sa gipa-uso nga pagkuha sa coco-lumber.
Liboan na ka seedling sa lubi ang napang-apod-apod ni Herrrea, kinsa mao usay Sangguniang Panlalawigan Agriculture Chairman.
Padayong mituo si Herrera nga ang industriya sa lubi kinanghanglang tinud-on sa pagsuporta.
Matud niya, ang lubi sa Pilipinas 59% gihapon sa global nga exports ug naghatag sa 1.14% sa matag tuig nga gross national product.
Samtang didto sa Korea, misaad ang CJ Corporation sa pagbutang ug planta sa coconut-based sweetener dinhi.
Gitumbok nga ipahimutang sa Davao del Sur, ang planta nga mokantidad ug $49M ug makatabang sa 3.5 milyones ka maglulubi lakip na ang kasagarang mga taga Bohol. (rachiu/PIA)
