TAGBILARAN CITY, Bohol, Mar. 22 (PIA)–Giseguro sa polisya nga mahimong luwas ug malinawon ang pagtimaan sa mga Katoliko sa Semana Santa, diin mas gihingosgan pa ang pagpatuman sa seguridad.
Epektibo kagahapon, gimando ni Philippine National Police (PNP) Chief Police Director General Alan Purisima nga ibutang sa heightened alert status ang tanang PNP units sa Luzon ug Visayas apil na ang mga National support units niini.
Samtang ang Mindanao apil ang mga miyembro sa Special Action Force (SAF) magpabiling naa sa full alert.
Gibutyag sa PNP Chief nga walay mga polis nga magbakasyon karong Semana Santa. Kini aron masiguro nga igo ang pwersa sa mga polis nga naa sa mga dalan nga magmentenar sa kahusay ug kalinaw.
Giseguro usab ni PNP spokesman C/Supt. Generoso Cerbo nga wala silay nadawat nga intelligence report kalabot sa hulga sa seguridad ug kalinaw karong Semana Santa.
Si Cerbo nagkanayon nga magtambayayong ang PNP ug Armed Forces of the Philippines (AFP) sa paghatag og igong seguridad karong Semana Santa. (PIA-Bohol/ecb/i-sjp)
Bawal mangampanya sa Huwebes ug Biyernes Santo – Comelec
TAGBILARAN CITY, Bohol, Mar. 22 (PIA)–Gipahinomdoman sa Commission on Elections (Comelec) ang mga kandidato nga itahud ang pagtimaan sa Semana Santa.
Matud pa ni Comelec spokesperson James Jimenez, bawal una mangampanya sa Huwebes Santo (Maundy Thursday) ug Biyernes Santo (Good Friday) base sa Section 5 sa Republic Act 7166.
Pasabot ni Jimenez, sa Huwebes ug Biyernes Santo daghang Katoliko ang mopahigayon og Station of the Cross ug pabasa mao nga angay lamang nga itahud kini sa mga kandidato.
Giingong hingpit nga gi-dili ang pagbutang og mga campaign posters ug uban pang election paraphernalias diin nakabutang ang pagtimbaya o lenten message sa usa ka politiko.
Pahinumdom pa ni Jimenez, ang mosupak niini posibleng mabilanggo ug 1 hangtud 6 ka tuig, diskwalipikasyon ug pagtangtang sa katungod nga maka-botar ug makalingkod sa bisan unsang puwesto sa gobyerno.
Sa Marso 29 na unta magsugod ang kampanya sa mga lokal nga kandidato apan natunong man kini sa Biyernes Santo mao nga gitakda na lang kini sa Comelec sa Marso 30, Sabado. (PIA-Bohol/ecb/i-gg)
