MAGTIAYON nga negosyante nakalingkawas sa pagsuway sa pagtulis kanila sa duha ka armadong lalaki didto sa barangay Magsaysay, Sevilla, Bohol niadtong Huwebes sa hapon.
Giila ang mga biktima nga sila si Conrado Marasigan, 43-anyos, minyo ug ang iyang asawa nga si Arlene Marasigan, 37-anyos, nagnegosyo og lumber ug taga-barangay Cogon, Balilihan, Bohol.
Nasayran sa taho nga samtang ang mga biktima nagsakay sa ilang multicab nga gimanehoan ni Conrado mga 1:30 sa hapon ug nagdagan sa barangay road sa maong dapit dihang kalit nga nibutho ang mga suspetsado usa niini armado og de kalibre nga pistola ug nimandar og pahunong.
Matud sa taho nga gimanduan sa mga suspek si Arlene nga itunol ang iyang shoulder bag nga may sulod nga salapi apan nibalibad ang naulahi hinungdan nga nagbinunlotay ug nakiglayog ang biktima sa maong tulisan nga nanawag og pakitabang sa ilang back-up nga nitago sa kasagbutan nga bahin apan wala kini niduol hinungdan nga nakahigayon og padagan si Conrado ug nipasirit sa ilang sakayanan pahilayo.
Gipusil ang mga biktima sa suspek apan wala kini makaigo.
Apan ang duha sa mga suspetsado nadakpan sa gihimong hot pursuit operation sa mga sakop sa Sevilla Police Station sa duha ka managlahing lugar sa dakbayan sa Tagbilaran kagahapon sa buntag.
Si Senior Inspector Basiledes Balistoy, hepe sa Sevilla PNP kinsa maoy nangulo sa operasyon niila sa mga suspetsado nga sila si Ariel Dugoy alias Aye, 19-anyos, ulitawo ug taga-Hanopol, Balilihan, Bohol ug Alberto Yugo, hamtong ang panuigon ug taga-barangay Cambagui, Sevilla, Bohol.
Matud ni Balistoy nga si Dugoy nadakpan mga alas 6 sa buntag didto sa balay sa iyang uyoan sa Sacred Heart Village sa barangay Cogon sa siyudad samtang si Yugo didto nadakpan sa bunkhouse sa Tagbilaran Community Hospital.
Ang duha gidala didto sa Sevilla samtamg tukmang sumbong giandam pa aron ipasaka sa piskaliya. (Andy Nalzaro)