TAGBILARAN CITY, Bohol, Mar. 01 (PIA–Nagka-uyon kagahapon ang Government of the Philippines (GPH) ug Moro Islamic Liberation Front (MILF) panels sa Kuala Lumpur, Malaysia sa usa ka mahinungdanong annex sa Bangsamoro Framework Agreement.
Ang gitawag nga Annex on Transitional Arrangements and Modalities (TAM) nagdetalye sa road map alang sa pagmugna og usa ka Bangsamoro region.
Hulipan sa Bangsamoro region ang Autonomous Region in Muslim Mindanao (ARMM) nga giingong usa ka pakyas nga eksperimento.
Base sa joint statement, gilagdaan usab sa magka-atbang nga partido ang Terms of Reference for the Independent Commission on Policing (ICP)
Trabaho sa ICP ang mo-umol og mga rekomendasyon kun unsaon ang istruktura ug katungdanan sa pulis sa Bangsamoro.
Samtang padayon pang gihisgotan ang mga Annexes sa wealth-sharing ug power-sharing sa gobyerno ug MILF. (PIA-Bohol/ecb/i-sjp)
Sore eyes ug heat stroke, angay bantayan karong summer – DOH
TAGBILARAN CITY, Bohol, Mar. 01 (PIA–Nipasidaan ang Department of Health (DOH) nga magbantay sa mga sakit nga mahimong makuha karong ting-init sama sa sore eyes ug heat stroke.
Matud pa ni Health Assistant Secretary Paulyn Ubial, ang common illness o sakit nga makuha kun init ang panahon mao ang sore eyes ug heat stroke.
Sigun pa kang Ubial, pipila sa mga senyales sa heat stroke ang grabe nga pagka-uhaw, pagpamugnaw ug pagkalipong.
Kun dili kini madali og tagad, giingong mahimong mag-hallucinate o malipong ug mahimo usab kining ikamatay.
Tambag sa DOH sa publiko, mo inom og walo ka basong tubig o labaw pa niini matag adlaw, manarapo ug bugnaw nga labakara sa lawas, magsuot og preskong sapot ug likayan ang pagpa-init ilabi na gikan alas-10:00 sa buntag hangtud alas-2:00 sa hapon.
Sa saktong pagpanghugas og mga kamot, malikayan usab ang sore eyes. (PIA-Bohol/ecb/i-hd)
