TAGBILARAN CITY, Bohol, Oct. 01 (PIA)–Kampante ang Malakanyang nga walay paglapas sa Konstitusyon o unsa mang balaod ang Disbursement Acceleration Program (DAP) nga gimugna sa administrasyong Aquino.
Matud pa ni Presidential Spokesperson Edwin Lacierda, adunay legal nga basehan ang maong lakang sa Presidente ug sa Department of Budget and Management (DBM).
Giingong nahisulod kini sa Article 6 Section 25 sa 1987 Constitution ug sa mismong Administrative Code nga mahimong kuhaon sa DBM ang mga wala nagamit nga pondo sa mga ahensya.
Partikular nga gitumbok sa tigpamaba sa Malakanyang ang paragraph 5 sa balaod nga nag-ingong:
“No law shall be passed authorizing any transfer of appropriations; however, the President, the President of the Senate, the Speaker of the House of Representatives, the Chief Justice of the Supreme Court, and the heads of Constitutional Commissions may, by law, be authorized to augment any item in the general appropriations law for their respective offices from savings in other items of their respective appropriations”.
Gidugang pa niini ang Sections 39 ug 49 sa Chapter V, Book VI sa 1987 Administrative Code isip mga legal nga basehan.
Apan kun may mo-kuwestiyon pa niini, gipasalig ni Lacierda nga andam nila kining ipasabot ug idepensa.
Gipasabot usab ni Presidential Communications Operations Office (PCOO) Secretary Sonny Coloma nga gimugna and DAP aron mahimong stimulus sa pagpalambo sa ekonomiya.
Masaligon si Coloma nga dasonan sa Korte Suprema ang legalidad sa DAP.
Kahinumdoman nga una nang gikuwestiyon ni kanhi National Treasurer Leonor Briones ang legal nga basehan sa pagmugna sa DAP sa DBM nga maoy nanghatag og minilyong pondo sa mga senador.
Nagpadayon na usab karon ang gihimong imbestigasyon sa Commission on Audit (COA) kalabot niini. (ECB/PIA7-Bohol)