TAGBILARAN CITY, Bohol, Sept. 9 (PIA)–Giseguro sa Malakanyang nga may manubag gayud sa kontrobersiyal nga Priority Development Assistance Fund (PDAF) scam aron mabalik ang pagsalig sa katawhan ug mga investors sa gobyerno.
Matud pa ni Deputy Presidential Spokesperson Abigail Valte, magbaton og resolusyon ang maong kontrobersiya ug sa katapusan niini, manubag gayud ang mga nakasala.
Aron masiguro nga manubag ang mga nalambigit sa anomaliya, i-base sa lig-on ug solidong ebidensiya ang idusong kaso.
“Kailangang tiyakin na magpapatuloy ang mga kaso, maisasampa ang kaso batay sa matibay na ebidensiya at, hindi po, at hindi po… wala ho itong kinilingan, wala ho itong tiningnan. Basta kung ano lang ho ‘yung talagang atas nung ebidensiya. Sa bandang huli, ito ang layunin ng lahat ng ito. ‘Di ba, ‘yung pananagutan lang naman ‘yung hinahabol natin dito,” pasabot ni Valte.
Gi-angkon usab ni Valte nga natabunan na sa anomaliya sa PDAF ang mga maayong balita nga nahitabo sa nasud.
Giingong dili lamang ang ehekutibo ang angay mopursige sa kaso apan apil na usab ang uban pang ahensya sa gobyerno.
Subling giseguro ni Valte nga mismong si Presidente Benigno ‘Noynoy’ Aquino III ang gustong mapasakaan og kaso ang mga nalambigit sa maong scam sa dili pa matapos ang iyang termino sa 2016. (PIA-Bohol/ecb)