TAGBILARAN CITY, Bohol, Jan. 29 (PIA)–NANAWAGAN ang Malakanyang sa pamunuan sa mga mall sa nasud nga hugtan pa ang ilang seguridad human sa nahitabong tulis sa SM Megamall niadtong Sabado.
Matud pa ni Presidential Spokesperson Edwin Lacierda, kinahanglang repasuhon ang pagpatuman og seguridad sa mga mall aron maseguro nga walay makalusot nga pusil o bisan unsang klase sa armas ilabi na nga gipatuman karon ang election gun ban.
“I think the SM management should take stock of the security measures that they have in their own malls. And that goes not only for SM. It also goes for all the other mall operators.”
“We would like to appeal to the mall operators to study their security measures and make sure that the security equipment that they have installed in their premises do in fact detect the presence of firearms.”
Kahinumdoman nga bisan walay naangol sa giingong pagpamusil sa mga kawatan nga mi-atake sa jewelry store sa SM Megamall niadtong Sabado, nagdala ang maong insidente og tensyon sa mga mamamalit didto. (PIA-Bohol/ecb/i-sjp)
NDRRMC, red alert status sa SoKor rocket launch
TAGBILARAN CITY, Bohol, Jan. 29 (PIA)–GIBUTANG na sa red alert status sa National Disaster Risk Reduction and Management Council (NDRRMC) ang tanang disaster operation centers (DOCs) tungod sa ikatulong satellite launch sa South Korea.
Target sa South Korea nga buhian ang ikatulo niining Science and Technology Satellite-2 (STSAT-2) gikan sa Naro Space Center sa Goheung, Jeollanam-do ugma, Miyerkules, Enero 30 hangtud Pebrero 8.
Base sa taho sa NDRRMC, gikan ang impormasyon sa Office of Asian and Pacific Affairs sa Department of Foreign Affairs (DFA).
Dungan niini, ipatuman usab ang no sail, no fly ug no fishing zone policy.
Padayon usab nga tutokan sa mga hingtungdang ahensya sa gobyerno ang maong satellite launch. (PIA-Bohol/ecb/i-gg)