NAANI sa Malacanang ang pasalig sa suporta gikan sa Kongreso alang sa lugway sa Comprehensive Agrarian Reform Program (CARP) law.
Matud ni Deputy Presidential Spokesperson Lorelei Fajardo, ang mga namunuan sa Senado ug Ubos Balay Balaoranan mipasalig na sa pagpaseguro nga unahon ang pagtuki sa lugway sa balaod nga gimatud-an sa Presidente nga labing dinalian.
Kini samtang gipaabot nga mapapas na ang epekto sa unang balaod ning buwana.
Ang pasalig nakuha mismo gikan sa mga Kongresista inubanan ni Speaker Prospero Nograles, Senate Agrarian Reform Committee Chair Gringo Honasan ug kini gisaksihan sa mga sakop sa Catholic Bishops Conference of the Philippines (CBCP) ug Agrarian Reform Secretary Nasser Pangandaman.
10 ka tuig nga lugway ang gipangayo sa Presidente sa programang reporma sa yuta aron lukpon ang dos milyones ektaryas nga nahibiling ikapang-apod-apod sa dos milyones ka mag-uuma. (PIA)