TAGBILARAN CITY, May 11 (PIA)–Gi-andam na karon ang transition team ni Davao City Mayor Rodrigo Duterte nga makig-alayon sa transition team sa Malakanyang.
Gikompirma kini sa mayor sa lungsod sa Maribojoc nga campaign manager ni Duterte nga si Leoncio “Jun” Evasco Jr. nga gitahasan sila karong adlawa, Mayo 11, nga makamugna na og committee.
Motabang ang transition committee sa pagpili sa mga mahimong cabinet members sa Duterte government.
Apil na usab ang pagrekomenda sa komite sa mga appointment ug preparasyon sa inagurasyon sa Hunyo 30.
Pipila usab sa pangandaman ang paghimo og programa ug mga kinahanglanong requirements sa inagurasyon.
Samtang miingon ang tigpamaba ni Duterte nga si Peter La Vina nga magmugna na usab sila karong sayo pa og komite nga moatiman sa pag-imbitar ug makig-alayon sa mga foreign governments, embassies, civil society groups, judiciary ug uban pa.
Sa pagkakaron, giingong may napiling lima ka pangalan na si Duterte apan dili una kini ibutyag sa publiko hangtud wala pay appointment papers. (ecb/PIA7-Bohol)