Malakanyang, way planong magmugna og anti-graft body
Taliwala sa panawagan sa pagpahigayon og lifestyle check sa pipila ka dagkong opisyal sa gobyerno, wala nakita sa Malakanyang ang panginahanglan sa pagmugna og bag-ong Presidential Anti-Graft Commission.
Matud pa ni Presidential Spokesperson Edwin Lacierda, dili na kini kinahanglan tungod kay nagpakita man ang Office of the Ombudsman sa ilang pagka-independente. Mao nga ilang mandato ang pagpahigayon sa mga gikinahanglang lakang aron pagsiguro sa good governance ug ethical practice sa mga opisyal sa gobyerno.
“They are performing their duties very well, so, we will leave it at that; and plus the fact that it is better for an independent body to conduct this lifestyle check, so as not to accuse anyone of favoritism or protection,” matud pa ni Lacierda.
Gipapas naman ni Presidente Benigno ‘Noynoy’ Aquino III ang Presidential Anti-Graft Commission (PAGC) pinaagi sa Executive Order No. 13 nga gilagdaan niadtong Nobyembre 2010.
Mitumaw ang mga panawagan karon nga ipaubos sa lifestyle check silang Bise Presidente Jejomar Binay ug Philippine National Police Chief General Alan Purisima kalabot sa giingong mga kwestiyonable nilang mga katigayonan. (ecb/PIA7-Bohol)