MANILA, October 10 (PIA)–Sa niaging 100 ka adlaw sa pangatungdanan ni Presidente Rodrigo Duterte, gitutokan sa Department of Health (DOH) ang health agenda sa administrasyon sa mosunod nga unom ka tuig.
Matud pa ni DOH Kalihim Paulyn Ubial, target sa administrasyong Duterte nga ipaubos sa mandatory annual check-up ang 20 ka milyong pinaka-kabos nga Pilipino sa tibuok nasod.
Pasabot pa ni Ubial, nanguna man sa listahan ni Presidente Duterte ang health agenda nga mahimong himsog ug makalikay sa sakit ang maong mga kabos.
Giingong ang listahan sa maong mga pinaka-kabos nga Pinoy maggikan sa Department of Social Welfare and Development (DSWD).
Gawas niini, giingong target usab sa gobyerno nga makab-ot kini sa mosunod nga 100 ka adlaw isip pinaskohan na usab alang sa atong mga kabos nga lungsoranon.
Dugang pa ni Ubial nga sa pagkakaron, libreng check-up lamang una ang gitanyag sa DOH alang sa mga kabos.
Matud pa sa Kalihim, kun ma-detect nga adunay sakit ang usa ka kabos nga indibidwal, hatagan kini og tambal o abagahon na sa gobyerno ang pagpatambal o pagpa-opera kun gikinahanglan. (ecb/PIA7-Bohol)