SA kamahinungdanon sa pagtapos sa pagtungha (graduation) sa kinabuhi sa mga batang magtutuon, giduso karon ni National Youth Commissioner (NYC) Benjie Oliva ang magpabalaod sa usa ka mandatory nga day-off sa mga trabahante alang ning katuyuan.
Kini alang sa paghulip sa dako nga haw-ang sa kinabuhi sa mga bata kansang mga pagtapos sa pagtungha wala matambungi sa ilang mga ginikanan.
Matud ni Comm. Oliva, kinsa Chairman sa Committee on Values sa NYC, ang pagtambong sa ginikanan sa pagtapos sa usa ka bata dako nga emosyonal nga suporta nga gipadayag, ilabi na sa kamabulokon sa maong okasyon.
May daghang mga hitabo nga ang ginikanan sa magtutuon nahikawan sa pagtambong sa graduation o commencement exercises tungod kay absenan kini kon mopalta sa pagtrabaho.
Mituo usab si Oliva nga ang pagpalta sa ginikanan sa graduation sa bata makahimo ug dako nga emosyonal nga kasakit sa bata samtang mahimong maulaw kini kay wala tambongi. (rachiu/PIA)