TAGBILARAN CITY, September 29 (PIA)–Ang Maritime Industry Authority (MARINA) mopahigayon og mobile registration alang sa mga dili rehistradong mga bangkang demotor karong umaabot Oktubre 12 taman 14 sa barangay Danao, lunsod sa Panglao.
Atol sa Kapihan sa PIA kagahapon, gi-aghat ni Norma Enriquez sa MARINA-Bohol nga mga tag-iyahag bangka nga gigamit alang sa island-hopping lakip na sa dolphin watching sa pagparehistro sa ilang mga sakyanan sa dagat aron mahimong legal ang ilang operasyon.
Gidasig usab ni Enriquez ang mga local government units ilabi na sa lungsod sa Panglao sa pagtabang sa pagpakatap niining kasayoran aron mapa-rehistro na ang mga dili pa rehistradong mga bangka sa ilang lugar.
Gihingosgan karon sa Philippine Coast Guard (PCG) ang pagdakop sa mga dili rehistradong bangkang demotor human sa nahitabong aksidente sa Panglao diin usa ka turista ang namatay tungod kay naigo kini sa speedboat.
Nanawagan si PCG Tagbilaran Station Commander Benjie Quinisio sa publiko nga dili gayud mosakay sa mga kulurom nga mga bangkang demotor alang sa ilang kaluwasan.
Matud pa nga ang mga tag-iyahan usab sa mga bangkang demotor kinahanglang mokuha og insurance alang sa ilang mga pasahero sa dili pa tugotang mo-operate.
Pipila sa mga rekisitos nga gipangayo sa balaod nga subayon sa MARINA aron makahatag sa rehistro sa mga sakyanan sa dagat mao ang mga kagamitan sa pagluwas sa kinabuhi: life jackets o salbabida nga ingon kadaghan sa pasahero nga luwan sa sakayan, labing menos duha ka life rings, nabansay ug kwalipekadong kapitan ug rehistradong mga tripulante, ug ang labing lisud mao ang pagbaton og two-way radio alang sa komunikasyon.
Matud pa ni Quinisio, ang two way radio nga rekisitos, pagseguro nga mamonitor sa kapitan sa bangka ang bisan kinsang sakayan sa dagat nga anaa sa iyang duol.
Kon rehistrado ang bangka, mas sayon ang paghimo og pagluwan niini kon may kadaut nga mahitabo, samtang masulod usab sa insurance ang bangka, mga trabahante niini ug mga pasahero, butang nga mahimong dili kayahon sa tag-iya sa bangka kon pasagdan na lamang. (ecb/PIA7-Bohol)