TAGBILARAN CITY, June 29 (PIA)–Gihimo na karon ang nagkalain-laing pagpangandam alang sa mas mabulokon ug sadyang pagsaulog sa Sandugo 2015.
Mao kini ang gipasalig sa mga opisyal nga nitambong sa gipahigayong Meet The Press Forum sa Bohol Tropics ning bag-o lang nga gipangunahan nilang Gov. Edgar Chatto, Tagbilaran City Mayor Baba Yap ug Sandugo Foundation chair ug Provincial Tourism Council Chair Atty. Lucas Nunag, binuligan usab sa Bohol Association of Hotels, Resorts, and Restaurants (BAHRR) pinaagi sa ilang president nga si Rommel Gonzales.
Gipasalig usab niini ang pagpatunhay sa kahapsay ug kalinaw ilabi na sa mga pantalan ug tugpahanan bisan sa pagdagsang sa ginaghanon sa mga Bol-anon nga mahidangat dinhi alang sa Tigum Bol-anon sa Tibuok Kalibutan (TBTK).
Ang mga kalihokan magsugod karong Hulyo 1 sa kasaulogan sa ika-49 Charter Day sa syudad sa Tagbilaran nga ipahigayon sa Bohol Cultural Center.
Gawas niini, ipahigayon ang Agri Fair (Hulyo 13-17), Trade Fair (Hulyo 22-27), International Food Fusion (Hulyo 22-26), Bohol Pop Music Festival ug Sandugo street dancing (Hulyo 26), Awards Night sa The Outstanding Boholanos Around the World (TOBAW) sa Hulyo 27 ug ang Miss Bohol 2015.
Samtang gitakdang mohimo og espesyal nga pasundayag alang sa mga Bol-anon ang Asia’s Got Talent 2015 grand winner El Gamma Penumbra sa Hulyo 27. (ecb/PIA7-Bohol)