MANILA, Jan. 03 (PIA)–Epektibo na sugod Enero 1, 2014 ang dugang nga binuwang kontribusyon sa mga miyembro sa Philippine Health Insurance Corp. (PhilHealth) ug Social Security System (SSS).
Ang nangamuhang myembro sa PhilHealth nga kaniadto adunay binuwang kontribusyon nga P175, magbayad na karon og P200. Tungaon sa employer ug empleyado ang maong kontribusyon.
Magbayad na usab karon og kontribusyong P200 ang mga Self-employed PhilHealth members o individually paying members (IPMs) nga kaniadto nagbayad lamang og P150 matag buwan.
Una nang gipahayag sa PhilHealth niadtong Oktubre 2013 nga ang mga IPM nga adunay binuwang kita nga P25,000 paubos magbayad og bag-ong premium annual rate nga P2,400.
Gawas sa mga self-employed ug voluntary member, apil usab sa mga IPM ang mga naa ubos sa Kalusugang Sigurado at Abot-Kaya sa PhilHealth Insurance program ug group enrollment scheme.
Adunay 3 ka scheme sa pagbayad ang pagapilian sa mga IPM: P600 per quarter, P1,200 semi-annually o P2,400 per annum.
Samtang sa abiso usab sa SSS, madugangan og 0.3 porsyento ang kontribusyon matag buwan sa mga empleyadong miyembro sa SSS ug 0.6 porsyento ang gisaka nga kontribusyon sa mga self-employed ug nagtrabaho sa ubang nasud, apil na usab sa mga boluntaryong naghulog og kontribusyon.
Sa 11 porsyento, 7.37% ang parte sa employer samtang 3.63% usab ang sa employee base sa salary credit. (PIA7-Bohol/ECB)