Mga health workers, gisugdan na pagbansay batok Ebola
MANILA, Oct. 29 (PIA)–Nagsugod na kagahapon ang tulo ka adlaw nga seminar sa mga health workers batok sa Ebola virus.
Nipaubos sa pagbansay sa World Health Organization (WHO) ug Department of Health (DOH) ang mga doktor, nurses ug medical technicians gikan sa 22 ka government ug DOH-referred hospitals nga adunay tig-lima ka tinugyanan.
Apil ang Philippine National Police (PNP) General Hospital ug Armed Forces of the Philippines (AFP) Medical Center sa mga tambalanan nga gibansay sa Research Institute for Tropical Medicine (RITM) isip frontliners.
Sa maong pagbansay nga matapos sa Huwebes, gitudlo sa mga sumasalmot ang mga sintomas ug timailhan sa Ebola virus, saktong pag-atiman sa mga pasyenteng maigo niini ug saktong komunikasyon sa publiko.
Gitakda usab nga ipaubos sa pagbansay sa DOH ug WHO ang mga health worker sa mga pribadong ospital ug local government units (LGUs) sa mga mosunod nga adlaw.
Gibutyag sa tigpamaba sa DOH nga si Dr. Lyndon Lee Suy nga gitun-an na usab nila ang paghatag og dugang-suholan sa mga moatiman sa mga pasyenteng adunay Ebola.
Gibutyag usab sa DOH ug RITM nga nakumpirmang positibo sa Malaria ug dili sa Ebola ang 19 ka balikbayan nga gikan sa West Africa human makasinati og taas nga hilanat. (ecb/PIA7-Bohol)