ANTEQUERA, Bohol, April 02, 2014 (PIA)–Gipangunahan ni Australian Ambassador to the Philippines Bill Tweddell ang pagduaw sa lalawigan sa mga kadagkuan sa Australian Parliamentary kagahapon.
Uban usab ni Tweddell si Australian House of Representatives Deputy Speaker Bruce Scott nga nibutyag nga ang Bohol ang nag-inusarang lalawigan lamang sa Pilipinas ang ilang giduaw gawas sa kaulohan tungod kay nabati nila nga kabahin na sila sa katilingbang Bol-anon.
Ang delegasyon sa Australia naglakip nilang Senator for South Australia Don Farrell, Senator
for Victoria Helen Kroger, Member of the Parliament for Bruce, Victoria Alan Griffin, Member for Hasluck, Western Australia Ken Wyatt, Adviser to the Deputy Speaker Elysia Ruttley, Peter Banson (ang kalihim sa delegasyon) ug ang asawa ni Scott nga si Joan.
Lima ka bulan human gitay-og ang Bohol sa 7.2 magnitude nga linog, ang kagamhanan sa Australia nakahatag na og P366 milyon (A$9 milyon) alang sa diha-dihang kahupayan ug hinabang sa nagpadayong recovery ug reconstruction sa lalawigan.
Uban ni Gob. Edgar Chatto, gisugdan kagahapon ang paghatag og pagtagad sa P275 milyon nga rehabilitation project nga naghiapil sa 14 ka nag-unang kadalanan sa Bohol nga binuligan sa kagamhanan sa Australia.
Ang maong pagbulig pinaagi sa Australian Assistance for International Development (AusAID), dili lamang alang sa pagpahiule sa kinatibuk-ang 124.62 kilometro sa kadalanan apan apil na usab ang kasamtangang kahigayonan sa panginabuhian alang sa 115,000 ka Bol-anon sa mga beneficiary areas.
Ang maong grupo naglakip usab sa mga opisyal sa Philippine Provincial Road Management Facility (PRMF) Program nga gi-abagahan usab sa AusAID.
Ang ceremonial groundbreaking gihimo sa tungang dalan nga nag-atubang sa barangay hall sa Bungahan, Antequera, usa sa 14 ka dalan nga ayuhon –ang Antequera-Balilihan road agi sa Dorol.
Ang ubang 13 ka road sections nga nalakip sa Australian-aided rehabilitation mao Poblacion Inabanga-Lawis road, Inabanga-Lapacan-Magtangtang road, Candumayao-Cabanugan road, Poblacion Catigbian-Rizal-Kagawasan (San Isidro) road, Cahayag (Tubigon)-Banlasan-Cabanugan road, Calape-Pangangan road, Tajang-Sandingan road, Alegria (Catigbian)-Baang-Jagbuaya-Janopol road, Abatan-Agahay-Busao-Toril-Aghao road, Hinawanan (Loay)-Concepcion-Junction (Loboc-Sikatuna) road, Cambuac (Sikatuna)-Lobgob (Sevilla) road, Jct (LIR)-Quinoguitan-Sevilla-Janopol road , ug ang Dimiao-Oac-Bilar road. (PIA7-Bohol/ECB)