TAGBILARAN CITY, Bohol, July 09 (PIA)–Gipagawas na sa Malakanyang ang mga bag-ong probisyong nakapasulod sa Executive Order (EO) 79 o Mining reform.
Sa usa ka press conference sa Malakanyang, miingon si Environment Secretary Ramon Paje nga magpabilin ang moratorium sa tanang bag-ong mining contracts tungod kay pending pa ang balaod kalabot sa revenue sharing tali sa gobyerno ug pribadong mining companies.
“No new mineral agreements shall be entered into until a legislation rationalizing existing revenue sharing schemes and mechanisms shall have taken effect,” base sa EO.
Bisan pa niini, giseguro ni Paje nga respetuhon sa gobyerno ang existing contracts sa mga mining company ug padayon nga susihon og maayo ang mga bag-ong mining applications.
Base usab sa bag-ong kamanduan, limitado na ang mga small mining operation sa gitawag nga “Minahang Bayan” ug bugtong ang Republic Act 7076 o People’s Small Scale Mining Act ang pagasundon sa small scale miners.
Gipahayag usab ni Paje nga idili na ang paggamit og mercury sa small scale mining activities.
Dugang pa sa kalihim, ikonsiderar nga iya sa gobyerno ang tanang mine waste ug mine tailings ug ipaagi sa bidding ang disposal niini.
Giingong nakapasulod usab sa EO ang pagmugna og Mineral Industry Coordinating Council (MICC) aron mapa-uswag ang environment standards sa nasud ug masiguro nga mosunod ang tanang mining companies niini.
Gibanabanang mokabat sa P16 bilyon ang kitaon sa gobyerno sa pagpatuman sa bag-ong kamanduan. (PIA-Bohol/ecb)
