MANILA, April 07, 2014 (PIA)–Dungan sa pagsaulog sa World Health Day, pormal usab nga gilusad sa Department of Health (DoH) ang ilang “Mosquito Dance.”
Mismong silang Health Secretary Enrique Ona, Assistant Secretary Eric Tayag ug mga tinugyanan sa World Health Organization (WHO) ang nanguna sa pagsayaw kontra sa lamok.
Matud pa sa DoH, makatabang ang Mosquito Dance aron magbaton og mas halapad nga atensyon ang kampanya sa ahensya batok sa mga lamok ug sa dala niining mga sakit sa katawhan sama sa malaria, dengue ug chikungunya.
Base sa datos sa WHO, nakaapekto ang maong mga sakit sa 2.5 bilyong biktima sa 100 ka nasud o halos 40% sa populasyon sa tibuok kalibotan.
Niini lamang niaging semana, daghan ang natalang kaso sa pagdaghan sa lamok sa ubang bahin sa nasud.
Tambag sa DoH, makatabang sa pagbatok sa sakit ang paggamit og screen sa balay, paggamit og insect repellent, pagsuot og long sleeve shirt ug pantalon ug paggamit sa mosketerto.
Mas maayo usab nga pangitaon ug limpyohan ang mga gipuy-an ug gipangitlogan sa mga lamok. (PIA7-Bohol/ECB)