MANILA, Jan. 02 (PIA)–Dili na kinahanglanon sa mga Pinoy ang visa sa pag-adto sa Myanmar sugod karong bulana.
Matud pa sa Department of Foreign Affairs (DFA), mahimo nang mosulod sa Myanmar ang mga Pinoy nga adunay ordinaryong pasaporte ug magpabilin didto sulod sa 14 ka adlaw sugod sa Enero 4, 2014.
Kini tungod kay sa maong petsa mahimong epektibo na ang kasabotan sa gobyerno sa Pilipinas ug Myanmar kalabot sa visa exemption.
Disyembre 5 sa dihang gilagdaan ang maong kasabotan sa pagbisita ni Myanmar President U Thein Sein dinhi sa nasud.
Gipaabot nga mas molambo pa ang turismo ug negosyo sa duha ka nasud pinaagi sa maong visa-free entry agreement. (PIA7-Bohol/ECB)
