GIBUKSAN na ang kontrobersyal nga Ninoy Aquino International Airport (NAIA) Terminal 3 alang sa sa Cebu Pacific Airlines (CEB), apan wala pa ibalhin ang panaw paingon sa Bohol didto.
Sumala sa na-andan, adto pa gihapon magsukad sa Manila Domestic Airport ang Manila-Tagbilaran-Manila nag panaw sa CEB.
Kadto rang mga CEB nga panaw paingon sa Caticlan, Naga, Tuguegarao, Laoag ug San Jose ang gibalhin sa Terminal 3 sa NAIA.
Ang CEB maoy una nga kostumer sa NAIA Terminal 3, matud ni Charlie Manuel, kinsa gikahinabi dungan sa pagsaulog sa Bohol Day Julyo 22.
Hinuon, sa dili madugay, ibalhin na usab ang base sa mga ruta nga gialagaran sa eroplanong CEB didto, sumpay niya.
Subay sa taho, matud usab ni Tirso Serrano, ang NAIA 3 assistant general manager, nga ang bag-ong terminal, may 8 ka inbound ug outbound nga byahe matag adlaw sa unang semana nga pag-bukas niini.
Sa sunod semana magsugod na usab ang byahe sa PAL Express ug Air Philippines sa pag-gikan sa bag-ong nabuksang terminal, nga gibanabanang mag-alagad sa 13 milyones sa pasahero matag tuig.
Gibuksan ang terminal human kabayri sa kagamhanan ang P3-B ngadto sa kontraktor nga naghimo niini, ang Philippine International Air Terminals co. (PIATCo), sa 2006. (rachiu/PIA)