MANILA, Mar. 27, 2014 (PIA)–Padayon ang administrasyong Aquino sa pagtutok sa pagpaningkamot aron makab-ot ang paglambo sa nasud nga maoy angay unahon sa gobyerno.
Kini ang gitumbok ni Kalihim Herminio Coloma, Jr. sa Presidential Communications Operations Office (PCOO) kagahapon isip tubag sa gipahigayong survey sa research group nga Ibon Foundation diin migawas nga daghang Pilipino ang naningkamot nga magbaton og pambayad sa mga nag-unang panginahanglan sama sa pagkaon ug tambal.
“Patuloy na nakatuon ang pagsisikap ng pamahalaan na makamtan ang kaunlaran upang mabawasan ang karalitaan at lumaganap ang pagkalingang panlipunan alinsunod sa Philippine Development Plan,” matud pa ni Coloma.
Giingong padayon ang mga hingtungdang mga ahensiya sa gobyerno sa pagbantay sa presyo sa mga nag-unang panaliton ug naghimo na og mga mahinungdanong lakang aron matabangan ang katawhan, ilabi na ang mga kabus nga sektor sa katilingban.
Matud pa sa Kalihim nga gitagaan og pagtagad sa administrasyong Aquino ang resulta sa maong survey sa Ibon sugod Enero 18 hangtud 24 nga 1,500 ang gipangutana.
Sa gipahigayong survey, 54.8 porsiyento sa mga gipangutana ang miingon nga naglisud silang makapalit og igo nga pagkaon sa milabay nga 3 ka buwan, samtang 53 porsiyento usab ang nipahayag nga naglisud sila sa pagpalit og tambal o pagbayad alang sa pagpa-konsulta sa doktor kun aduna sila’y sakit.
Gitumbok ni Coloma nga sa nasudnong budget sa 2014, nigahin ang gobyerno og P87.1 bilyon alang sa Universal Health Care, ilabi na sa mga serbisyong may kalabot sa paglikay sa mga sakit ug aron maapil sa health insurance coverage ang may 14.8 milyong kabus.
Gawas niini, nigahin usab og P79 bilyon ang gobyerno aron masigurong hapsay nga mapatuman ang mga mahinungdanong serbisyo ilabi na ang mga gipaubos sa gipalapdang P62.6 bilyong programang Pantawid Pamilyang Pilipino.
Gipasabot usab sa Kalihim nga gihimo ang Ibon Survey sa dihang nisaka sa 4.2 porsiyento ang inflation tungod sa mga nahitabo sa kalibotan, ilabi na ang patakaran sa US Federal Reserve nga nakaapekto sa pinalitay sa dolyar sa peso.
Matud pa ni Coloma nga padayong misalig ang atong mga economic managers nga ang inflation mapadayon sa 3 hangtud 5 ka porsiyento nga target sa Development Budget Coordination Committee. (PIA7-Bohol/ECB)