TAGBILARAN CITY, Bohol, Aug. 22 (PIA)–Nagdeklarar ang Malakanyang og National Days of Mourning kalabot sa pagpanaw ni Interior Secretary Jesse Robredo sa dihang nihagsa sa kadagatan sa Masbate ang eroplanong iyang gisakyan niadtong Sabado sa hapon, Agosto 18.
Pagbalik ni Presidente Benigno “Noynoy” Aquino III sa Manila human personal nga gihatod ang patay’ng lawas sa mipanaw nga kalihim sa pamilya niini sa Naga kagahapon, gilagdaan niya dayon ang Proclamation No. 460 nga nagdeklarar og National Days of Mourning.
Epektibo kini sugod gahapon (Martes) Agosto 21, hangtud sa adlaw sa paglubong ni Robredo.
Ubos sa maong deklarasyon, gitahasan ang tanang buhatan sa gobyerno sulod ug gawas sa nasud nga i-half mast ang mga bandila sulod sa unom ka adlaw.
Gi-andam na usab sa Malakanyang ang usa ka state funeral alang kang Robredo. (PIA-Bohol/ECB/I-gg)
Walay mass layoff sa DAR
TAGBILARAN CITY, Bohol, Aug. 22 (PIA)–Walay mahitabo nga mass layoff sa han-ay sa mga empleyado sa Department of Agrarian Reform (DAR).
Kini ang gitin-aw ni Agrarian Reform Secretary Virgilio delos Reyes isip reaksiyon sa balitang tangtangon niini ang may 9,000 ka kawani sa DAR tungod sa gipatuman nga re-organization sa ahensya.
Gitataw ni delos Reyes nga walay tangtangon nga empleyado apan repasuhon lamang sa ahensiya kauban ang Department of Agriculture (DA) ug Department of Environment and Natural Resources (DENR) ang mga nag-unang trabaho sa matag departamento aron walay duplikasyon sa trabaho ang tulo ka opisina.
Nag-ugat ang kahadlok sa mga empleyado sa DAR sa probisyon sa proposed 2013 budget nga adunay kalabot sa staffing structure.
Matud pa ni delos Reyes nga gikonsederar usab nila ang kaayohan sa mga trabahante ug ilang pamilya mao nga walay pagpangtaktak nga mahitabo.
Giingong kun mahuman na usab ang ilang trabaho sa pagpangapud-apud sa yuta sa 2016, adunay option pa gihapon sa balaod ang mga kawani sama sa early retirement.
Apan gitataw sa kalihim nga sayo pa kaayo nga hisgotan kini. (PIA-Bohol/ECB/I-hd)