NEDA, mi-aprobar sa P81-M pondo
alang sa pagpaayo sa mga tulay sa Bohol
TAGBILARAN CITY, Bohol, Oct. 20 (PIA)–Ang National Economic and Development Authority (NEDA) mi-aprobar sa pondo alang sa ‘Restoration of Damaged Bridges in Bohol’, lakip sa 12 ka bag-ong proyektong pang-imprastraktura sa bag-o lang gipahigayon nga NEDA board meeting nga gipangunahan ni Presidente Benigno ‘Noynoy’ Aquino III.
Ang gi-aprobahan nga restoration woks nagkantidad og P81 milyon diin ang proponents niini mao ang Department of Public Works and Highways (DPWH) ug Department of Agrarian Reform (DAR).
Kinatibuk-ang 14 ka tulay ang proyoridad niini, kadtong nangagubang tulay nga nahisubay sa Bohol Circumferential Road pinaagi sa Mega Bridges for Urban and Rural Development (MBURD) ug ang Tulay ng Pangulo Para sa Kaunlarang Pang-Agraryo ( TPKP) ug Road Upgrading and Preservation Project (RUPP).
Tumong sa maong mga proyekto ang pagpaayo ug pagpatukod sa kinatibuk-ang 14 ka tulay nga nangagusbat tungod sa 7.2 magnitude nga linog nga nitay-og sa lalawigan niadtong Oktubre 15 sa niaging tuig.
Proyoridad niini kadtong mga nahisubay sa Bohol Circumferential Road ubos sa nagpadayong Official Development Assistance (ODA)-assisted roads and bridges projects. Nahisulod niini ang 9 ka proyektong ubos sa DPWH-JICA assisted RUPP, 3 ubos sa DPWH-MBURD ug 2 ubos sa DAR-TPTK.
Gibanabana ang implementasyon sa mga nahisgotang proyekto nga gitakda sa: RUPP – 2011 hangtud 2020; MBURD – hangtud Oktubre 2016; TPTK – hangtud Agosto 2014 nga adunay proposed mode of financing pinaagi sa ODA ug estimated implementation schedule nga upat ka tuig nga magsugod sa 2015. (ecb/PIA7-Bohol)