Oktubre 15, gi-deklarar nga special non-working day sa Bohol
TAGBILARAN CITY, Bohol, Oct. 10 (PIA)–Gi-deklarar ni Presidente Benigno ‘Noynoy’ Aquino III pinaagi sa Presidential Proclamation No. 887 ang Oktubre 15, 2014 (Miyerkoles) isip special non-working day sa tibuok lalawigan sa Bohol.
Ang maong proklamasyon gi-aprobahan pinaagi ni Executive Secretary Paquito Ochoa Jr. niadtong Oktubre 9, 2014.
Gi-ila sa maong proklamasyon ang kamahinungdanon sa unang tuig nga anibersaryo sa linog sa Bohol nga niresulta sa pagkakalas sa daghang kinabuhi, kadaot sa kabtangan ug pagkunhod sa ekonomiya.
Agi usab kini og paghatag og pagtugot sa hangyo sa Kagamhanang Probinsiyal sa Bohol sa paghandom sa anibersaryo sa linog isip adlaw sa pag-ampo ug pasalamat.
Si Gob. Edgar Chatto ug ang tibuok Sangguniang Panlalawigan ning bag-o lang niduso og resolusyon ngadto kang Presidente Aquino nga e-deklarar ang Oktubre 15 isip special non-working holiday sa lalawigan sa Bohol.
Ang mass motion pormal nga giduso ni Board Member Cesar Tomas Lopez sa usa ka special session niadtong Setyembre 17.
May mga kalihokan na nga naka-andam alang sa Oktubre Kinse:The Bohol Earthquake Memorial sa Executive Committee nga gimugna pinaagi sa executive order sa gobernador.
Ang maong mga kalihokan gimugna pinaagi sa executive committee nga gilangkoban sa Provincial Government, City Government of Tagbilaran ug Diocese sa Tagbilaran ug Talibon.
Ang probinsiya sa Bohol gitay-og sa magnitude 7.2 nga linog niadtong Oktubre 15, 2013 sa alas 8:12 sa buntag. Apektado niini ang tibuok rehiyon sa Central Visayas, ilabi na ang Bohol ug Cebu. Nabati ang maong linog sa tibuok Visayas ug hangtud pa sa isla sa Masbate sa norte ug probinsiya sa habagatang Mindanao.
Base sa opisyal nga datos sa National Disaster Risk Reduction and Management Council (NDRRMC), 222 ang natala nga namatay, 8 ang nangawala ug 976 ang naangol. Sa kinatibuk-an, labaw sa 73,000 ka estraktura ang nangadaot diin 14,500 niini ang totally destroyed. (ecb/PIA7-Bohol)